ცნობიერების ამაღლების კამპანიის ფარგლებში, პირველად, აჭარის ავტონომიურ რესპუბლიკაში, “ნარჩენების მართვის ბიზნეს ასოციაციის“ აღმასრულებელი დირექტორი, ვანო მთვრალაშვილი და ვიცე-პრეზიდენტი, ირმა პატარაია სკოლებს ესტუმრნენ და ნარჩენების მართვის სისტემის, ცირკულარული ეკონომიკის, ნარჩენების მართვის ევროპული გამოცდილებისა და ბუნებრივი რესურსების გონივრული გამოყენების შესახებ კომპეტენტური ინფორმაცია მიაწოდეს.
ასოციაციას უმასპინძლა ვახტანგ პაპუნიძის სახელობის დაბა ქედის საჯარო სკოლამ, რომელსაც „ეკო სკოლის“ სტატუსი აქვს მინიჭებული და არის მწვანე დროშის მფლობელი პროექტის მიხედვით ,,დაიცავი საქართველოს სისუფთავე”.
შეხვედრას ასევე ესწრებოდნენ დოლოგნის საჯარო სკოლის მოსწავლეებიც. შემეცნებითი ხასიათის შეხვედრაზე, სკოლის მოსწავლეებთან ერთად, მონაწილეობა მიიღეს სკოლის დირექტორმა, თამარ აბულაძემ და ბიოლოგიის პედაგოგებმა: მანანა მგელაძემ და ვარდო ნაგერგაძემ.
აჭარაში ვიზიტის ფარგლებში, ,,ნარჩენების მართვის ბიზნეს ასოციაცია“ ასევე ესტუმრა ხელვაჩაურის რაიონის სოფელ ზემო თხილნარის საჯარო სკოლას, სადაც მოქმედებს ეკო-კლუბი ,,ბუნების ქომაგები“. კლუბის წევრები აქტიურად მონაწილეობენ სხვადასხვა ღონისძიებაში, არიან „ნიკო კეცხოველის“ პრემიის მონაწილეები. შეხვედრას ესწრებოდნენ მასწავლებლები: მარიამ ბერიძე, ნათია კეკენაძე, ანზორ ტეტემაძე, ვენერა თურმანიძე.