2025 წლის 15-17 მაისს, “ნარჩენების მართვის ბიზნეს ასოციაციის” ვიცე-პრეზიდენტი – ირმა პატარაია, აღმასრულებელი დირექტორი – ვანო მთვრალაშვილი და ასოციაციის აღმასრულებელი გუნდის წარმომადგენლები, საქმიანი ვიზიტით იმყოფებოდნენ აჭარის რეგიონში.
დაგეგმილი ღონისძიებების ფარგლებში, პირველი სამუშაო დღე დაეთმო საბურავების იმპორტიორ და რეალიზატორ კომპანიებთან შეხვედრას, რომლებიც “ნარჩენების მართვის ბიზნეს ასოციაციის” წევრები არიან და დასავლეთ საქართველოში საქმიანობენ.
შეხვედრაზე დეტალურად განვიხილეთ ასოციაციის 2024 წლის საქმიანობის ანგარიშგება, შეგროვებული და გადამუშავებული ნარჩენების სტატისტიკური მონაცემები და მნიშვნელოვანი გამოწვევები, რომლებიც დაკავშირებულია გარემოსდაცვით მოთხოვნებთან და რეგულაციებთან.
ღონისძიება ინტერაქტიულ რეჟიმში წარიმართა, რაც მონაწილეებს შესაძლებლობას აძლევდა აქტიურად ჩართულიყვნენ დისკუსიაში, გამოეხატათ მოსაზრებები და მიეღოთ ამომწურავი ინფორმაცია მათთვის აქტუალურ საკითხებზე. განსაკუთრებული ყურადღება დაეთმო სამომავლო სტრატეგიული მიმართულებების დაგეგმვას, მათ შორის – ნარჩენების მართვის სისტემის გაუმჯობესებას, რეგიონულ თანამშრომლობასა და ნარჩენი საბურავების გადამამუშავებელი საწარმოს შექმნას.
ასოციაცია მიიჩნევს, რომ მსგავსი სახის სამუშაო შეხვედრები არსებითად უწყობს ხელს სპეციფიკური ნარჩენების მართვის მოდელის განვითარებას საქართველოში!